Брытанская выведка назвала колькасць ліквідаваных пад Курскам паўночнакарэйскіх жаўнераў

• 24.01.2025, 15:11

Страты КНДР уражваюць.

Да сярэдзіны студзеня 2025 года сілы КНДР страцілі 4000 чалавек у наступальных баявых аперацыях супраць украінскіх сіл у Курскай вобласці. З іх прыкладна чвэрць былі забітыя ў баі.

Пра гэта паведамляе Міністэрства абароны Вялікай Брытаніі ў X (Twitter).

Як адзначаецца ў справаздачы, агульныя страты складаюць больш за траціну з прыкладна 11 000 чалавек войскаў КНДР, размешчаных у Курскай вобласці.

Паводле звестак брытанскай выведкі, высокі ўзровень страт КНДР за кароткі перыяд часу амаль напэўна значна пагоршыў здольнасць сіл КНДР праводзіць наступальныя баявыя аперацыі ў падтрымку спробаў Расеі выцесніць украінскія сілы з Курскай вобласці.

«Нягледзячы на значныя баявыя страты, войскі КНДР дабіліся толькі тактычных поспехаў у Курскай вобласці. Расейскія сілы і сілы КНДР амаль напэўна адчуваюць цяжкасці з узаемадзеяннем. Гэтыя дзве сілы не гавораць на агульнай мове, і войскі КНДР амаль напэўна адчуваюць цяжкасці з інтэграцыяй у расейскую структуру камандавання і кіравання», - адзначаюць у Мінабароны Брытаніі.

Нагадаем, увосень мінулага года Паўночная Карэя адправіла блізу 11 тысяч салдат на дапамогу войскам Масквы ў Курскай вобласці на поўдні Расеі, дзе УСУ захапілі тэрыторыю пасля нечаканай аперацыі мінулым летам.

Высокапастаўлены прадстаўнік міністэрства абароны ЗША сказаў The New York Times, што КНДР накіруе на фронт новых жаўнераў, а падмацаванне чакаецца «цягам наступных двух месяцаў».