Расея ўдарыла балістыкай па порце ў Адэсе: загінулі замежнікі

• 12.03.2025, 11:02

Балістычнай ракетай пашкоджанае судна пад сцягам Барбадаса.

Расейскія войскі нанеслі ракетны ўдар па порце ў Адэсе ўвечары 11 сакавіка. Пашкоджанае судна і інфраструктура, загінулі замежнікі.

Пра гэта паведамляе РБК-Украіна са спасылкай на віцэ-прэм'ер-міністра ў аднаўленні Украіны Аляксея Кулебу ў Telegram.

Балістычнай ракетай пашкоджанае судна MJ PINA пад сцягам Барбадаса. У момант удару судна загружала пшаніцу для экспарту ў Алжыр.

У выніку расейскага нападу загінулі чатыры чалавекі - грамадзяне Сірыі. Самаму малодшаму загінуламу было 18, самаму старэйшаму - 24 гады. Са слоў Кулебы, яшчэ два чалавекі атрымалі раненні: украінец і сірыец. Ім надаецца неабходная дапамога.

Віцэ-прэм'ер дадаў, што таксама было пашкоджанае яшчэ адно судна, прычалы, склады для захоўвання збожжа.

«Важна, каб партовая інфраструктура была абароненая ад тэрору, а свабоднае і бяспечнае мараплаўства было гарантаванае. Павінны і далей узмацняць нашу супрацьпаветраную абарону, сілай зброі і сілай дыпламатыі дасягаць надзейнага міру і бяспекі», - падкрэсліў Кулеба.

Абноўлена

Як удакладніла пракуратура, удар быў а 20.17 11 сакавіка, папярэдне, балістычнай ракетай тыпу «Іскандэр-М». У выніку атакі загінулі чацвёра замежных грамадзян - чальцы экіпажа, яшчэ адзін чалец экіпажа і супрацоўнік порта атрымалі раны, дастаўленыя ў шпіталь.

Праваахоўнікі распачалі крымінальную справу паводле факту ўчынення вайсковага злачынства, якое пацягнула гібель людзей (ч. 2 арт. 438 КК Украіны).