WSJ: ЗША просяць Кіеў аб дапамозе з новай зброяй
- 12.03.2025, 23:03
Яна ёсць толькі ва Украіне.
Украінская беспілотная індустрыя здзейсніла сапраўдны тэхналагічны прарыў за час вайны. Цяпер Пентагон і амерыканскія стартапы шукаюць супрацоўніцтва з украінскімі вытворцамі, бо ніводная кампанія ў ЗША не паспявае за Украінай, паведамляе The Wall Street Journal.
Украіна - сусветны лідар у беспілотнай авіяцыі. За гады поўнамаштабнай вайны ўкраінскія кампаніі асвоілі масавую вытворчасць дронаў нават ва ўмовах абмежаваных рэсурсаў.
У 2024 годзе Украіна зрабіла 2 мільёны беспілотнікаў, многія з якіх ляцяць на сотні міль і знішчаюць цэлі ў Расеі. У адрозненне ад амерыканскіх аналагаў, украінскія дроны адаптаваныя да радыёздушэння, каштуюць у дзесяць разоў танней, а іх распрацоўка і ўкараненне займаюць лічаныя месяцы, а не гады.
Амерыканскія вайсковыя экспэрты прызнаюць, што ЗША адсталі ў развіцці беспілотных тэхналогій. З афіцыйных звестак Пентагона, Амерыка можа вырабляць толькі 100 000 дронаў на год, у той час як Украіна ў 20 разоў больш.
«Ніхто не можа здагнаць узровень вытворчасці дронаў ва Украіне», - заявіла Вольга Пагода, сузаснавальніца ўкраінскага стартапа Blue Arrow, які ўжо атрымаў замовы ад войскаў Еўропы.
Чаму ЗША звярнуліся па дапамогу да Украіны? ЗША ўклалі мільярды даляраў у распрацоўку невялікіх беспілотнікаў для будучых войнаў, але вынік расчараваў: дроны дарагія, павольна вырабляюцца і не вытрымліваюць сучасных умоў бою.
Амерыканскія кампаніі, якія пастаўлялі свае дроны Украіне, назіралі, як яны проста падалі з неба праз магутную РЭБ з боку Расеі. У выніку Пентагон і прыватныя кампаніі ЗША пачалі шукаць супрацоўніцтва з украінскімі вытворцамі, прадукцыя якіх ужо даказала сваю эфектыўнасць на полі бою.
«Ніводная кампанія ў ЗША не паспявае за Украінай. Іх тэхналогіі працуюць, таму што стаўкі занадта высокія», - прызнае Нейтан Мінтц, сузаснавальнік амерыканскага стартапа CX2, чые сэнсары ўжо выкарыстоўваюцца ва ўкраінскіх беспілотніках.
Падраздзяленне абаронных інавацый Пентагона (DIU) упершыню закантрактавала два супольныя ўкраінска-амерыканскіх прадукты.
Калі тэставанне пройдзе паспяхова, гэта адкрые шлях для афіцыйных кантрактаў з Мінабароны ЗША.
Нягледзячы на перспектыўнае супрацоўніцтва, існуюць перашкоды:
- абмежаванні Украіны на экспарт дронаў, якія могуць запаволіць інтэграцыю на міжнародныя рынкі;
- недавер Кіева да Вашынгтона на фоне дыпламатычных супярэчнасцяў;
- залежнасць ад кітайскіх кампанентаў, што не задавальняе Пентагон, паколькі ЗША не могуць дапусціць закупку прадукцыі з кітайскімі дэталямі.
Тым не менш, Украіна ўжо заявіла, што хоча стаць сусветным цэнтрам беспілотнай авіяцыі пасля заканчэння вайны.
А для ЗША ўкраінскія тэхналогіі - шанец здагнаць сваіх канкурэнтаў і ўмацаваць уласныя пазіцыі ў будучых канфліктах.