«Беларусбанк» пачаў набываць манеты ў насельніцтва паводле коштаў ад 100 рублёў

• 12.03.2025, 21:41

Гаворка ідзе пра манеты «Славянка».

З 11 сакавіка ў беларусаў з'явілася магчымасць не толькі набыць у «Беларусбанка», але і прадаць яму зліткавыя або інвестыцыйныя манеты Нацбанка «Славянка» з золата і срэбра, гаворыцца ў інфармацыі, размешчанай на сайце банка.

Манета «Славянка» выпускаецца Нацбанкам Беларусі з 2013 года і прызначаная для інвеставання і ашчаджэння грашовых сродкаў.

Кошт манеты вызначаецца з улікам коштаў, якія склаліся на міжнародным рынку каштоўных металаў.

Так, напрыклад, на сайце банка ёсць інфармацыя пра кошты. Залатая манета «Славянка» наміналам 50 рублёў набываецца за 2350 рублёў, а прадаецца за 2650 рублёў. Што да срэбнай манеты «Славянка» наміналам 20 рублёў, то яе набываюць за 100 рублёў, а прадаюць за 190 рублёў.