Анджэй Дуда заклікаў ЗША размясціць ядзерную зброю ў Польшчы

• 13.03.2025, 10:14

Расея не вагалася, калі перакідала сваю ядзерную зброю ў Беларусь.

Прэзідэнт Польшчы Анджэй Дуда заклікаў ЗША перанесці амерыканскія ядзерныя боегалоўкі, якія захоўваюцца ў Заходняй Еўропе ці ЗША, на тэрыторыю Польшчы ў якасці стрымлівальных чыннкаў супраць будучай расейскай агрэсіі.

У інтэрв'ю Financial Times Дуда заявіў, што нядаўна абмяркоўваў гэтую прапанову з Кітам Келагам, спецыяльным пасланцам ЗША аб Украіне.

«Межы NATO зрушыліся на ўсход у 1999 годзе, таму праз 26 гадоў інфраструктура NATO таксама павінна быць ссунутая на ўсход. Для мяне гэта відавочна. Я думаю, што справа не толькі ў тым, што час прыйшоў, але і ў тым, што было б больш бяспечным, калі б гэтая зброя ўжо была тут», - сказаў ён.

Як адзначае FT, раней камуністычны рэжым Польшчы размяшчаў у сябе савецкія ядзерныя боегалоўкі падчас халоднай вайны. У той жа час захоўванне такой зброі паблізу расейскіх межаў - на гэты раз пад кантролем ЗША - будзе разглядацца Крамлём як сур'ёзная пагроза.

Дуда сказаў, што прэзідэнт ЗША Дональд Трамп павінен сам вызначаць, дзе размяшчаць ядзерную зброю ЗША, але нагадаў аб тым, што Расея перамясціла тактычную ядзерную зброю ў Беларусь.

«Расея нават не вагалася, калі перакідала сваю ядзерную зброю ў Беларусь», - сказаў Дуда. «Яны ні ў каго не пыталіся дазволу».

Дуда таксама паўтарыў словы польскага прэм'ер-міністра Дональда Туска аб тым, што краіна магла б у якасці альтэрнатывы атрымаць лепшую абарону ад ідэі прэзідэнта Эмануэля Макрона распаўсюдзіць "ядзерны парасон" Францыі на еўрапейскіх супольнікаў.