Найбуйнейшыя заходнія кампаніі адмовіліся ад вяртання ў Расею
- 14.03.2025, 19:34
Яны згадалі аб незаконных канфіскацыях сваіх актываў расейскімі ўладамі.
Нягледзячы на актывізацыю чутак аб масавым вяртанні заходняга бізнэсу ў Расею на фоне амерыкана-расейскіх кантактаў аб Украіне, найбуйнейшыя з кампаній, якія пакінулі РФ, не пацвердзілі гэтыя здагадкі.
Аб гэтым піша The Bell (пераклад - The Moscow Times), які звярнуўся з адпаведным запытам на адрас больш чым 60 прадстаўнікоў бізнэсу з краін Захаду.
На зварот выдання адказала 21 кампанія. Ніводная з іх не дала станоўчы адказ на пытанне аб планах па вяртанні ў Расею. Сярод тых, хто сапраўды не збіраецца аднаўляць сваю дзейнасць у РФ, – кампанія з Фінляндыі Nokian Tyres, якая выпускае шыны, латвійскі дыстрыбутар электронікі ELKO Group, тэлекамунікацыйны холдынг VEON, хіміка-прамысловая кампанія Henkel (Нямеччына), нідэрландскі холдынг IKEA, а таксама японскі аўтаканцэрн Nissan, рытэйлер спартовых тавараў Decathlon (Францыя) і нямецкая нафтагазавая кампанія Wintershall Dea.
У кампаніях адзначылі, што для іх вяртання ў Расею павінны здарыцца «фундаментальныя і доўгачасовыя» перамены на геапалітычнай арэне. Таксама шэраг кампаній згадаў аб незаконных з іх пункту гледжання канфіскацыях сваіх актываў расейскімі ўладамі.
«Выкуп [актываў па апцыёне] будзе разглядацца толькі ў выпадку фундаментальных і доўгачасовых змен у геапалітычнай сітуацыі. На гэты момант мы гэтага не бачым», - заявілі ў Henkel, падкрэсліўшы, што кампанія «выразна скончыла» сваю дзейнасць у РФ у 2022 годзе пасля пачатку вайны ва Украіне.
«Як мы заяўлялі пры продажы нашага расейскага бізнэсу ў 2022 годзе, для аднаўлення ўмоў яго вядзення неабходна больш шырокае змяненне палітычнай абстаноўкі. Мы працягваем сачыць за сітуацыяй у Расеі, але на гэты момант не можам даць дадатковых каментароў», – адзначылі ў Nissan. У Wintershall Dea паведамілі, што кампанія працягвае судзіцца з Расейскай Федэрацыі «для абароны сваіх прававых пазіцый» пасля фактычнай і юрыдычнай экспрапрыяцыі актываў.
Шэраг кампаній, таксама заявіўшы аб адсутнасці планаў па вяртанні ў Расею, адзначылі, што пакуль «назіраюць за сітуацыяй» у краіне. Гаворка ідзе аб нафтасэрвіснай Baker Hughes - там вывучаць сітуацыю ў выпадку зняцця санкцый з РФ; Bosch – кампанія вядзе абмеркаванні з «Газпрам бытавыя сістэмы», але не прыводзіць падрабязнасцяў; вытворца ліфтаў Otis - там паведамілі, што цяпер яшчэ рана казаць аб вяртанні.
Больш за тысячу кампаній, ад McDonald's да Mercedes-Benz, пакінулі расейскі рынак пасля пачатку ўварвання расейскага войска ва Украіну ў 2022 годзе, прадаўшы, перадаўшы мэнэджмэнту або адмовіўшыся ад актываў у РФ. Частка з іх сышлі на ўмовах магчымасці зваротнага выкупу, іншыя - прадалі бізнэс мясцовым інвестарам вымушана пасля яго часовай канфіскацыі.