Трамп заінтрыгаваў новымі падрабязнасцямі пра перамір'е ва Украіне

• 15.03.2025, 10:22

«У панядзелак даведаемся больш».

У пачатку наступнага тыдня павінна быць больш падрабязнасцяў пра магчымае спыненне агню ва Украіне. Адпаведную заяву зрабіў прэзідэнт ЗША Дональд Трамп у гутарцы з журналісткай Шэрыл Эткісан.

Адказваючы на пытанне журналісткі, ці меў ён зносіны асабіста з расейскім дыктатарам Уладзімірам Пуціным апошнім часам, Трамп сказаў, што не хоча пра гэта гаварыць, але пацвердзіў: зносіны ідуць.

«Не хачу пра гэта гаварыць, але мы маем зносіны, і ідзе нядрэнна», – сказаў кіраўнік Белага дому.

Паводле словаў Трампа, гэта вельмі складаная сітуацыя, але ён мяркуе, што «справы ідуць добра» ў спробе дамагчыся спынення расейскай вайны супраць Украіны.

Прэзідэнт ЗША адзначыў, што амерыканскі бок дамовіўся з Украінай пра спыненне агню, а цяпер хоча атрымаць згоду на перамір'е ад РФ.

«Думаю, пакуль усё ідзе нармальна. У панядзелак даведаемся больш. Спадзяюся, будзе добра», – дадаў амерыканскі лідар.

Акрамя таго, журналістка нагадала Трампу пра ягонае перадвыбарнае абяцанне скончыць вайну ва Украіне за дзень.

У адказ на гэта прэзідэнт ЗША сказаў, што ён «крыху жартаваў», калі рабіў тыя заявы. Пры гэтым Трамп прадаўжае меркаваць, што здолее дамагчыся заканчэння вайны.

Журналістка таксама спытала прэзідэнта ЗША, які ў яго план, калі Пуцін адмовіцца ад спынення агню.

Трамп адказаў, што гэта будзе вельмі дрэнная сітуацыя для свету, бо гіне вялікая колькасць людзей, аднак ён упэўнены, што кіраўнік краіны-агрэсаркі пагодзіцца на перамір'е.