У Менску пачалі выдаваць аўтанумары з «васьмёркай»

• 15.03.2025, 15:20

Кажуць, усе самыя «прыгожыя» камбінацыі ў ДАІ ўжо разабралі.

У пачатку гэтага года ў Менску пачалі выдаваць рэгзнакі серыі XX. Стала зразумела: літары ў «рэгістрацыйным» алфавіце заканчваюцца, трэба нешта думаць, піша «Зеркало».

ДАІ доўга ўтойваць інтрыгу не стала: неўзабаве абвясцілі, што з сакавіка ў сталіцы будуць выдаваць нумары з васьмёркамі на канцы. Тыя, хто марыў пра «прыгожыя» рэгзнакі, адразу затаілі дыханне: бо самыя «блатныя» варыянты з сямёркай даўно разышліся па руках, і часцяком аўтааматары прадавалі іх з рук з высокімі прайсамі.

Цяпер жа з'явіўся шанец паспець адхапіць сабе рэгістрацыйны знак, які адлюстроўвае вашу індывідуальнасць, паводле афіцыйных расцэнак ДАІ (за 2520 рублёў, калі дакладней). Здаецца, ажыятаж быў сур'ёзны. Беларусы паведамляюць: усе самыя прыгожыя камбінацыі ўжо скончыліся.

Вось такі шыкоўны нумар «вырваў» адміністратар Instagram-старонкі @avtonomer.by (старонка прысвечаная прыгожым і рэдкім аўтанумарам). Здаецца, гэта самая эстэтычная камбінацыя з васьмёркай на канцы, якая магла б быць. Колькі людзей давялося расштурхаць локцямі ў бітве за такія рэгзнакі?

– Штодзённая варта і ніякага блату, – такі рэцэпт поспеху расказаў суразмоўца. – Планую ездзіць з імі ці перапрадаваць? Пакуль не надумаў. Наколькі ведаю, камбінацыі, якія змяшчаюць пяць васьмёрак, скончыліся за дзень. Мае знаёмыя ездзілі ў ДАІ пасля мяне, казалі, маўляў, нічога ўжо не было. Больш за тое, паводле іх словаў, усе камбінацыі 0001, 8888 і 0008 таксама разабралі.

Журналісты паспрабавалі праверыць інфармацыю, якая тычыцца таго, што ўсе «блатныя» камбінацыі ў ДАІ скончыліся. Аднак звязацца з афіцыйнымі прадстаўнікамі ўстановы не ўдалося.

Таксама яны патэлефанавалі ў адразу некалькі рэгістрацыйных органаў ДАІ сталіцы. У аддзяленнях, якія знаходзяцца на аўтарынку ў Малінаўцы і ў ГЦ «Першы нацыянальны гандлёвы дом», адказалі: каб зрабіць нумар паводле індывідуальнай замовы, трэба патрапіць на асабісты прыём да кіраўніка пункта рэгістрацыі МРА ДАІ ў Ждановічах (гэта значыць на вул. Ціміразева, 114) або ж у «Аўтамол “Кальцо”».

Інфармацыю, якія камбінацыі яшчэ даступныя, праз тэлефон паведаміць не змаглі.