СМІ: Кіеў дамогся прарыву ў важнай вайсковай тэхналогіі

• 16.03.2025, 13:52

Кітай больш не зможа шантажаваць Украіну.

Украіна зрабіла вызначальны крок да незалежнасці ў сферы беспілотнай авіяцыі: кампанія Vyriy Drone ўпершыню перадала ўкраінскім вайскоўцам тысячу FPV-дронаў, сабраных выключна з украінскіх дэталяў, піша «Милитарный».

Гэта сапраўдны тэхналагічны прарыў, які пазбаўляе краіну ад залежнасці ад кітайскіх дэталяў, бо Кітай - хаўруснік Расеі і абмяжоўвае экспарт тэхналогій, якія могуць выкарыстоўвацца ў вайсковай сферы.

Цяпер без Кітая

Кампанія Vyriy Drone перадала цеплавізійныя 8-цалевыя FPV-дроны, створаныя без адзінай кітайскай дэталі. Уся электроніка, уключаючы камеры, відэаперадатчыкі, палётныя кантролеры і сістэмы кіравання, праведзеная ўкраінскімі кампаніямі D1 і Odd Systems.

Гэта азначае, што Украіна больш не залежыць ад паставак з Кітая, які раней узмацніў экспартны кантроль за тэхналогіямі падвойнага прызначэння.

Пастанова аб поўнай лакалізацыі прынятая самімі вытворцамі, хаця кантракт гэтага не патрабаваў.

Vyriy Drone два гады працавала над заменай замежных дэталяў, і зараз кампанія будзе пастаўляць толькі цалкам украінскія дроны.

Лакалізацыя дазволіла знізіць кошт і нарасціць вытворчасць

Адмова ад кітайскіх дэталяў не прывяла да падаражання дронаў - дзякуючы правільнай эканамічнай палітыцы іх удалося зрабіць таннейшымі да ўзроўню FPV-дронаў з кітайскімі запчасткамі (блізу 30 000 грыўняў за адзінку).

Намеснік міністра абароны Валерый Чуркін паведаміў, што ва Украіне рыхтуюць падатковыя льготы для вытворцаў высокатэхналагічнай прадукцыі, каб падтрымаць лакальную вытворчасць БПЛА.

Украіна выходзіць на новы ўзровень. Украінскія дроны ўжо сталі сапраўдным кашмарам для расейскага войска.

Толькі ў 2024 годзе УСУ вырабілі больш за 2 мільёны БПЛА, што перасягнула магчымасці ЗША, Еўропы і Расеі.

Цяпер дзякуючы поўнай адмове ад кітайскіх дэталяў Украіна стварае беспілотнікі, якія не залежаць ад замежных пастаўшчыкоў, што робіць іх вытворчасць стабільнай і стратэгічна бяспечнай:

Гэта найважнейшы этап у развіцці ўкраінскай беспілотнай авіяцыі.

Украіна працягвае нарошчваць вытворчасць і набліжаецца да статусу сусветнага лідара ў сферы FPV-дронаў.

Расейскае войска неўзабаве сутыкнецца з яшчэ больш магутнай хваляй украінскіх БПЛА, а Кітай больш не зможа паўплываць на вытворчасць ва Украіне.